平民的錶子

2015年7月23日星期四

買錶前既準備3 - 德俄機芯

依篇係講機芯既尾二一篇
睇埋下一篇，你大致上會對機芯有個概括既理解
當然，只係概括，手錶世界係無窮無盡，我所識既只係九牛一毛

首先，要講下德國機芯，我既最愛
某程度上，德國機芯係唔應該係依篇文章出現
因為德國機芯全部都貴到喊，不過因為係我既最愛，所以都講下喇
我有上有一隻NOMOS GLASHUTTE
佢係少數比較平既真正德國機芯手錶，不過平極都要一萬以上了

不過我只會講概括，因為要講德國錶，已經可以講幾篇野了

首先，基本上真正德國機芯係無通用機芯
即是佢只會係個別廠商為自己品牌生產
係唔會好似日本或者瑞士咁賣出去比其他廠用

要認識德國機芯，一定要識一個地方　－　GLASHUTTE　格拉蘇蒂
依個係一個德國重鎮
德國三間最出名既錶廠就係位於依個鎮
分別係Nomos, Glashutte Original, A lange & Sohne
佢地既錶各有特色, 亦都係用自製機芯, 佢地都係根據德錶既傳統去製作
至於德錶同瑞士錶有咩唔同, 就有機會再另外講
因為價錢唔平民, 同埋要講可以講好幾篇

現階段你要知既係, 德國機芯既裝飾真係好靚!
機芯本身已經係一條藝術品
有人話德錶錶背靚過錶面, 絕對係有道理, 唔講咁多, 有圖有真相

A lange & Sohne

Glashutte Original

Nomos

好, 講完德錶, 就到俄錶
俄錶既特色就係平, 結構簡單易維修 (不過香港就唔多人識整...), 同埋耐用
事實上當年蘇聯有好多錶廠, 係蘇聯解體後做唔住已經執左
有好多好唔錯既機芯都已經停曬產

我之前另一篇開箱文章既潛水錶就係來自其中一間仲做得住既錶廠 - Vostok
而當中既自動機芯係vostok caliber 2416

依個自動機芯既設計就係為左當年蘇聯紅軍大量生產, 低成本
有防震平衡, 不過係無停秒功能
而佢保養年期大約係十年一次, 比一般機芯3-5年長左足足一倍
而講準, 就唔係好準架喇, 每日慢30s/快60s
以粗用黎計都可以既, 最重要係平, 成隻錶都只係四百幾蚊, 仲可以潛200米, 仲想點

而另外一隻經典機芯就係Poljot 3133手上鏈計時機芯, 而Poljot依間廠好似已經執左 (唔肯定)

其實Poljot 3133就係ETA 7734, 當年ETA賣左個license比Poljot去生產依個機芯
兩者有咩分別? 平囉
而當年蘇聯太空人都係帶佢上太空
依家都有d廠復刻返Poljot 3133
好似Strela就係用3133 MakTime
都係評價好唔錯既平價計時錶

一般瑞士計時機芯手錶要賣到接近成萬蚊, 平既都要8千左右
而俄制既計時機芯手錶大約5千零蚊都已經有交易
當然, 都係同之前一樣, 依兩款只係最常見既機芯
俄錶仲好唔少機芯的

下一篇 (事實上得半篇)係最後一篇講機芯, 就係講GDP太空強國 - 中華人民共和國既 "自主設計開發"機芯
嗯.... "自主設計開發"機芯, 你懂的...

2015年6月15日星期一

買錶前既準備2 - 日本機芯篇

上次講完瑞士機芯
今次輪到另一個手錶生產大國　－　日本
不過要講明先，我對日本機芯認識唔多，所以我只可以粗略講一講
日本最常見有兩間廠

１．精工 Seiko
２．星辰 Citizen

首先，講一講精工
相信精工無人不識，好多人聽到精工　＝　ｃｈｅａｐ
其實只係好片面，精工一樣有幾萬以致幾十萬既手錶
其工藝，性能，準確度都比唔少同價名錶高
依個有機會再講

精工最流行有幾隻機芯
１．７Ｓ系列自動機芯

用係精工最最最最ＣＨＥＡＰ既機械錶５系（俗稱５仔），交易由幾百蚊起，賣得咁平既原因係佢真係好ＣＨＥＡＰ，入面有用瑞士機芯唔會用既塑膠零件，加上佢連停秒,手動上鍊功能都無（一般自動機芯會有埋手動上鍊），官方既準確度誤差大約係最多加減半分鐘一日，不過咁平，都唔好咁多要求

２．４Ｒ系列自動機芯
基本上同７Ｓ系列一樣

３．６Ｒ系列

７Ｓ同４Ｒ既進化版，有停秒同手上鍊功能，準確度都比較高，大約加減１５秒一日

其實我比較少見到出面有用精工機芯（除左精工自己）
相對上比較見得多係星辰既機芯

星辰做既機芯叫ＭＩＹＯＴＡ
自從ＥＴＡ減少對外供應機芯後，唔少細廠都轉左去ＭＩＹＯＴＡ機芯
點解？平囉

見得最多既就係８２１５機芯

簡單Ｄ講，佢係日本平價版既ＥＴＡ　２８２４－２
有咩分別？貴Ｄ梗係好Ｄ喇

８２１５機芯準確度低少少
上鍊效率低少少
但能量儲存就多過２８２４－２五個鐘

當然，以上都係理論黎，實際上用落差唔多
但有用家投訴８２１５個上鍊陀好噪，
我自己未聽過，但咁細舊野應該噪極有限既
而聽講ＭＩＹＯＴＡ平ＥＴＡ　５０％
只係價錢上既分別已經贏喇

其實ＭＩＹＯＴＡ仲有隻９０１５
係８２１５既升級版，比２８２４－２簿
準確度有所提升
不過依個我都少見Ｄ，所以唔講了

其實上面講既都係一Ｄ常見既平價機芯
每間廠都有佢既ＨＩＧＨ　ＥＮＤ　ＬＩＮＥ，或者其他機芯，不過唔常見／貴就唔講了
好似精工，就有比勞力士更準確，更靚既機芯
不過就一Ｄ都唔平民喇

依兩章已經講左市面上最常見既機芯
基本上你已經識睇曬市面上７０％以上有質素平價機械錶既機芯
我要強調有質素，唔好搵Ｄ無”素質”，用中國機芯既錶黎比

下一章我會講下一Ｄ比較冷門既機芯
好似我最愛既德國芯（當你見到德國芯真係會愛上，可惜全部都貴到喊）
我最憎既中國芯，平到笑既俄羅斯機芯

2015年6月9日星期二

買錶前既準備1 - 瑞士機芯篇

首先，依篇文章有兩類人唔岩睇

１．諗住買石英錶，因為石英機芯我唔識分，我只睇機械錶
２．唔理機芯，是但個款岩就得

而咩人岩睇依篇文章？簡單ｄ講－唔想做水魚
手錶款式多如天上繁星，市面有性價比高既手錶
但更多係垃圾料當貴價野，值四五千既料賣到成一萬
所以要玩錶，又唔識點睇隻錶值唔值個價
就好似師奶連間公司係做咩都唔知，就去買佢隻股一樣
輸左唔好喊

首先，要講下機械錶既機芯係咩黎
機芯就係一隻錶既心臟
隻錶識唔識行，行得準唔準，有咩功能（ｅｇ．計時，月相，日曆）都係睇機芯
佢就好似人個腦同心臟咁，無佢就會死，唔識郁
雖然香港中國有好多膠官兩樣野都無都識郁識９ｕｐ，不過佢地係咪人就係一個問題

機芯主要分幾個來源
１．瑞士芯
２．德國芯
３．日本芯
４．中國芯
５．俄羅斯芯

雖然仲有其他唔同既機芯產地，不過以上都基本上包括左市場上９５％以上既機芯

本篇會講下瑞士芯，因為佢可以話係市場上霸主，大部分現代機芯多多少少都會同瑞士芯扯上關係，就算你唔玩手錶，都知瑞士手錶好出名喇

由於依個ｂｌｏｇ係叫平民的錶子,果ｄ貴價機芯我都唔會講喇
最主要講都係平價手錶會用既機芯
講到平價瑞士機芯，一定要識一間公司－　ＥＴＡ
ＥＴＡ機芯可以話係市場上既超級霸主
佢出既機芯，由幾千蚊到成十萬既手錶都有用
大多數平錶都會自己設計個機殼，錶面，再買個ｅｔａ芯返黎組裝
你可能會問，幾千蚊到十萬都用，邊個會咁戅尻用十萬買幾千蚊錶都有既機芯？
好問題，一陣再解釋

最流行既ＥＴＡ機芯主要有幾隻
１．　２８２４－２自動機芯（即係識通過人體活動自動上鍊）

最常見既ｅｔａ機芯，一般大三針既錶款都係用佢黎做

高頻率（理論上愈高愈準），可靠，易維修令佢十分受歡迎

咩叫大三針？睇圖：

２．　６４９８手動上鍊機芯

另一款常見既機芯，原來設計黎係比陀錶用
係手錶出現係幾近淘汰，近年出現返大呎吋手錶
而令佢返生，結構簡單，易維修亦令佢十分受歡迎
一般用於小三針設計，亦有經改裝成大三針

３．　７７５０計時自動機芯

最常用既計時自動機芯，叫得計時機芯

梗係要黎計時，好多公司都會用佢黎做計時錶

好，講左幾款常見機芯，代表咩？
簡單Ｄ講，你買佢地做機芯既錶，點都唔會衰得去邊
因為幾十年黎發展，用家測試，依堆機芯都已經係好穩定
就算有咩唔妥，拎去鴨寮街既師傅都識整

回答返一個問題：幾千蚊到十萬都用，邊個會咁戅尻用十萬買幾千蚊錶都有既機芯？
其實貴錶用ｅｔａ芯，有唔少人都唔滿意
好似ｔｕｄｏｒ，　ｉｗｃ幾皮野都用依ｄ芯，點解？
當然，佢地個機殼會比較貴
但好多時佢地既ｅｔａ機芯係經過大量改裝，調較同打磨
會靚好多，功能可能多左，亦都準左，貴就貴在依度
以下係一ｄ經過改裝打磨既機芯

不過留意
ｅｔａ係ｓｗａｔｃｈ集團旗下既一間公司
而ｓｗａｔｃｈ已經決定左會減少對非ｓｗａｔｃｈ集團既公司供應機芯
直至完全停止對外供應
咁點算？當然，依個世界唔會邊個無左邊個唔得
正如香港無左中國一樣唔會死咁

隨住ｅｔａ減少對外供應，
而由於２８２４－４同埋６８９７既專利已經過左（７７５０唔知過左未）

已經有唔少細廠開始生產同ｅｔａ一樣既機芯

當然，價錢一定會比以前貴，因為細廠做唔到ｅｔａ個大ｓｃａｌｅ生產
其中比較出色既瑞士細廠有Soprod

當然，瑞士做機芯一定唔止ｅｔａ
香港人最愛既勞力士，Zenith, Patek Philippe都有自製機芯

不過都不在本ｂｌｏｇ範圍了

講咁多，其實個重點係揀錶要睇機芯
好似Panerai, Ball依ｄ錶，賣到幾萬蚊隻
但好多時比人質疑佢用一ｄ，基本上無咩打磨改裝過既ｅｔａ機芯
點解買到咁貴？
睇到依度，就要閣下自行評價了

今日講到依度，下次再講埋其他機芯

＊圖片來自網絡，未能一一盡錄來源，敬請原諒

2015年5月30日星期六

蘇聯紅軍用潛水錶開箱

工欲善其事必先利其器:P

要食俄妹要咩? 識俄文當然重要
但最重要識到, 打開話題 (比錢另計)
一隻黎自俄羅斯, 前蘇聯紅軍蛙人用既潛水錶可以令你係俄妹面前表達出你非凡既品味

三個半星期前係俄羅斯網訂左隻VOSTOK (音大約係: 獲索) 潛水錶 (前蘇聯國防部供應商)
全自動機械錶, 用俄羅斯機芯

今日收到黎自俄羅斯既掛號包裹#hehe#

俄文唔知寫咩

打開包裹, 個盒成個棺材咁

有本說明書, 又係俄文:o)

主角出場

個款點就見人見智, 好多人覺得佢柒, 不過我就BUY佢個70年代STYLE#good#

背面又係俄文

錶面係凸出黎

上手

講咁耐, 都未講重點
依隻可以潛入200米深, 全自動機械錶, 用俄羅斯機芯既錶要幾錢?
計埋運費, 掛號送上門, 多謝
$560
係, 港幣$560計埋運費!!
你買隻精工石英錶都可能買唔到

亦因為佢咁平, 外國好多高手自己買D PARTS返黎改, 以下係一D例子

我遲D都會買個外圈同錶帶返黎改, 等帶厭左原裝先

邊度買
我依隻就依度買
http://chistopolcity.com/

依個賣VOSTOK錶最出名, 不過好多款斷曬貨
http://meranom.com/

依兩個德國網, 香港買平19%, 第二個出名服務好
http://www.am-watches.com/
http://www.poljot24.de/